Rom 4 | ZomZIV | STEP | Tua ahileh i pu Abraham in hih thu ah bang mukhia ci ding i hi hiam?

Romans 4

Upna Hanga Diktang Abraham

1 Tua ahileh i pu Abraham in hih thu ah bang mukhia ci ding i hi hiam? 2 A taktak in, Abraham in a sepsa hangin diktang hileh amah in kisialh nading a nei hi - ahi hangin Pasian mai-ah ahi kei hi. 3 Laisiangtho in bang ci ahi hiam? “Abraham in Pasian na uma, tua ama upna thumaanna in kisimsak hi,” ^{▼▼4.3 Pc. 15:6; tg. 22 ah zong} ci hi. ^b

4 Mi khat in na a sep ciangin tua ama nasep thaman pen letsong in kisim lo-a, thalawhsa in kisim hi. 5 Ahi hang in na sem lo a, mi tatsiate dik a tangsak Pasian a muang mipa ama upna pen thumaanna-in kisim hi. 6 Sepnate tawh kisai lo, Pasian in thumaan hi, ci-a a sim mipa thupha ngahna thu David in a gen lai-in tua mah a na gen ahi hi. A gen na ah: ^c

7 “A tatkhialhnate uh kimaisak a,
a mawhnate uh a kikhuhsakte,
thupha ngah ahi uh hi.
8 Topa in ama langah a mawhna
mawhna-a a simsak lohpa thupha ngah ahi hi.” ^{▼▼4.8 Ph. 32:1,2} a na ci hi.

9 Hih thupha vunatte ading bek ahi hiam? Vunat lote ading zong hi lo ahi hiam? Abraham upna ama adingin thumaanna in kisim khin hi, cih i gengen lai hi. 10 A bangci dana kisim ahi hiam? A vunat khit ciang ahi hiam? A at ma ahi hiam? A at khit hi lo, a at ma ahi hi! 11 Vunat ahi nai loh lai-a upna hanga a ngah thumaanna ciamteh nadingin vunat ciamtehna a ngah hizaw hi. Tua ahi ciangin amau adinga thumaanna-a a kisimsak theih nadingin vunat lo napi-a a umte khempeuh pa hong suak hi. 12 Amah vunat bek hi lo, i pa Abraham in a vunat ma-a, a neih upna khekhap a zui vunatte pa zong ahi hi. ^e

13 Leitung luahpa ahi nadingin kam ciam, Abraham le a suan a khakte in a ngahna uh thukham tungtawn hi loin upna hanga hong piang thumaanna tungtawn hizaw hi. 14 Ahang in, thukham suanga nungtate gouluahte hi ahi uh leh upna in man nei lo a, tua kamciam in zong kimanna a nei kei hi. 15 Bang hang hiam cih leh thukham in thangpaihna a tun hi. Tua hi-a thukham om lohna ah tatkhialhna zong a om kei hi.

16 Tua ahi manin tua kamciam hehpihna hang ahi theih nading le thukham suangte hi loin Abraham upna bang upna a suangte ahi ama suan le khakte khempeuh tungah thukho ahi theih nadingin upna hanga hong tung ahi hi. Amah, eite khempeuh pa ahi hi. 17 “Nang minam tampite pa kong suaksak khin zo hi.” ^{▼▼4.17 Pk. 17:5} ci-a kigelhsa bang ahi hi. Amah a site nuntakna pia-a a om lopi nangawn a omsa banga a genpa, a uppa Pasian muhna ah eite pa ahi hi. ^g

18 “Tua mah bangin na suan na khakte zong ahi ding hi,” ^{▼▼4.18 Pk. 15:5} ci-a ama tunga kigensa bangin Abraham in lamet nading om lo napi lamen in um ahi manin minam tampite pa a suak hi. 19 Amah a khan kum zakhat bang pha ta a, ama pumpi a si tawh kibang ahina le Sarah sul zong a keu ahina thu upna kiam tuan loin a maituah hi. 20 Tua hi napi Pasian kamciam tawh kisai-in uplahna hangin hoi lo, a upna khauhzawin Pasian minthanna apia zo hi. 21 Pasian in a kamciam banga a tang tunsak theih nading vang a neihna thu, kiptakin a sang hi. 22 “Ama adingin thumaanna in kisim hi,” cih hih thu hang ahi hi. 23 “Ama adingin kisim hi,” cih kammalte amah guak ading bek hi lo a, 24 i Topa Jesu misi pana a thosakpa Pasian in thumaanna-a a simsak ding a um eite adingin zong a kigelh ahi hi. 25 Eite mawhna hangin amah sihna sungah kipiakhia a, diktansakna i ngah nadingin kihing kiksak hi. ⁱ